បន្ទាយមានជ័យ ៖ ផ្សារម៉ាឡៃ ស្ថិតនៅភូមិវាលហាត់ ឃុំម៉ាឡៃ ស្រុកម៉ាឡៃ ដែលជាទីតាំងមានការពាក់ព័ន្ធនឹងការឆ្លងរាលដលនៃជំងឺកូវីដ-១៩ ក្នុង “ព្រឹត្តការណ៍សហគមន៍ ២០ កុម្ភៈ ២០២១” ត្រូវបានបិទជាបណ្ដោះអាសន្នសម្រាប់រយៈពេល២ (ពីរ) សប្ដាហ៍គិតចាប់ពីថ្ងៃទី០៧ ខែឧសភា ឆ្នាំ២០២១ រហូតថ្ងៃទី១៩ ខែឧសភា ឆ្នាំ២០២១។ នេះបើតាមសេចក្តីសម្រេចរបស់ខេត្តបន្ទាយមានជ័យ នៅថ្ងៃទី០៦ ខែមេសា ឆ្នាំ២០២១នេះ។
អភិបាលខេត្តបន្ទាយមានជ័យ លោក អ៊ុំ រាត្រី បញ្ជាក់ថា ការបិទជាបណ្ដោះអាសន្នផ្សារម៉ាឡៃរយៈពេល២ (ពីរ) សប្ដាហ៍នេះក្នុងគោលបំណងធានាដល់ប្រសិទ្ធភាពនៃការគ្រប់គ្រងការឆ្លងរាលដាលនៃជំងឺកូវីដ-១៩ ក្នុងព្រឹត្តការណ៍សហគមន៍ ២០ កុម្ភៈ ២០២១ នៅក្នុងភូមិសាស្ត្រដែលត្រូវបិទនិងទប់ស្កាត់ជំងឺនេះមិនឲ្យឆ្លងរីករាលដាលទៅកាន់តំបន់ផ្សេងទៀតរហូតមានការចេញសេចក្តីសម្រេចជាថ្មី។
លោក អ៊ុំ រាត្រី បានប្រគល់ភារកិច្ចជូនរដ្ឋបាលស្រុកម៉ាឡៃ ដើម្បីបង្កើតក្រុមការងារប្រចាំការក្នុងភូមិសាស្ត្របិទផ្សារ សម្រាប់ទទួលបន្ទុកអនុវត្តនិងសម្របសម្រួលលើការងារចាំបាច់ រួមមាន ៖ការងារផ្នែកសន្តិសុខ និងសណ្តាប់ធ្នាប់សាធារណៈ ការងារត្រួតពិនិត្យ និងគ្រប់គ្រងទីកន្លែងលក់ម្ហូបអាហារ ហាងទំនិញ និងការផ្គត់ផ្គង់ទំនិញ ការងារទាក់ទងនឹងការអនុវត្តវិធានការសុខាភិបាល ជាអាទិ៍ ការយកសំណាក ការធ្វើចត្តាឡីស័ក ការព្យាបាលជំងឺកូវីដ១៩ និងការចាក់វ៉ាក់សាំងជាដើម៕
